يازيرام
حضرتی علیرضا
قلم اليمده آدونلان گئنه غزل يازيرام
سالوب خياليمه رخسارون آي گؤزل يازيرام
کتاب معرفتي واژه‌واژه آختاريرام
يوخ اؤزگه واژه سني وصف ائدم، گؤزل يازيرام
بيري جمالون آيا اوخشادير گونه بيريسي
ولي من حُسنوي اعجاز لم‌يزل يازيرام
مَثَل ويرار هامي اؤز يارينه دئير يوسف
ملاحت عالمي منده سني مَثَل يازيرام
گؤزومون اوستونه آهسته قوي قدملروي
اگرچه عشقوه من قلبيمي محل يازيرام
گلوب گئدن منه ديل‌ياره‌سي ويرور سن‌سيز
آجيلي زهريدي، اَحلي مِنَ العسل يازيرام
گئدور بو قافله‌ي عمر صبر و تاب آزالور
گؤزوم ياشيلا يولون ساق‌سولوندا گل يازيرام
وصاله وئرميه مهلت اجل، بودور قورخوم
يازاندا نامه سنه مين يول «العجل» يازيرام